/p. 91/ DIALOGUS XVI.
De fluviorum generatione.
Alex. –
Tu vero quam putas fluviorum
originem? I. C. – Salomon, ab
Hebraeis habitus Sapientiae Deus,
existimavit flumina e mari trahere
initium. Alex. – Quendam Atheum
hesterno die sum allocutus (ad convertendum,
ut dici solet apud rusticanos Apuliae incolas),
qui demirabatur quomodo Salomon sapientissimus
dijudicetur, cum omnes eius Commentarij
nec ratiunculae umbram prae se ferant,
sed populares duntaxat sententiolas et cupidineos
versiculos omni dicendi lepore destitutos.
Ego vero illum validissimis convici rationibus,
a quibus nunc, ne longius digrediamur, supersedeo.
Sed, animi gratia, tum ut veritas disputando
elucescat, adversus Salomonis opinionem
sic obijci posse crederem. In altissimis
montium verticibus aquae sunt, at non a mari
ad tantam altitudinem posse attrahi suadet
ratio a libella aquilegorum petita. Ea est: non
posse aquam motu subvehi altius, quam sit
eius superficies unde derivatur, quam rationem
te non negaturum spero, qui in tuis Astronomicis
scripsisti Naturam aquae dedisse